Bekanntlech huet den FC JEUNESSE USELDANGE, deen 1945 gegrënnt gouf, jo am Joer 2020 säi 75. Gebuertsdag gefeiert. Dës Feierlechkeeten, déi iwwer d’ganz lescht Joer sollte stattfannen, sinn der Coronapandemie zum Affer gefall, an hu missten op spéider Datumer verluecht ginn.

De leschte Sonndeg, 26. September 2021 konnt dunn awer nom Championnatsmatch FC JEUNESSE USELDANGE-ALLIANCE ÄISCHDALL (4-2) een Deel vun de Feierlechkeeten nogeholl ginn.

 

De Fussball hat am Joer 2019 en Organisatiounskommitee « 75 Joer FC JEUNESSE USELDANGE » op d’Bee gestallt, deen ee flotte Programm ausgeschafft hat, an och ee Gebuertsdagsbuch erausbruecht huet. Dëst Buch ass scho virun enger gudder Zäit erauskomm, huet 431 Säite mat villen Artikelen, virun allem, awer nit nëmmen, iwwert den Useldenger Fussballveräin. D’Buch kann nach ëmmer duerch eng Iwwerweisung vu 35 Euro op de Kont vum FC JEUNESSE USELDANGE, bestallt ginn.

 

Nieft dem Buch gouf awer och, no enger Iddi vum Georges Calteux, President vum Organisatiounskommitee, eng metalle Konstruktioun ronderëm ee Lannebam gebaut, déi fir ëmmer un de 75. Gebuertsdag erënnere soll. Dës Konstruktioun erlaabt et, sech gemittlech op enger Bänk Plaz ze huelen, a sech déi op Placketten aggravéiert Nimm vu Leit a Firmaen unzekucken, déi op eng oder déi aner Manéier mat eisem Fussball verbonne waren oder nach sinn, an zu sengem Succès beigedroen hunn. Och Ären Numm kann op esou eng Plackett aggravéiert ginn, wann Dir eis wéilt 125,- Euro iwwerweisen.

 

An enger gemeinsamer Feier, organiséiert vum Fussballveräin an der Gemeng Useldeng gouf dëse Bam e Sonndeg dem Public presentéiert an offiziell ageweit. A Presenz vum Chamberpresident Fernand Etgen, dem Minister Marc Hansen, enger Rei Buergermeeschteren a Politiker aus den Nopeschgemengen, der Famill vum Nic. Anzia, der Useldenger Musek a ville Frënn a Sympathisante vum Veräin, huet de Claude Boudler d’Leit begréisst, an ass op d’Geschicht vum Jubiläumsveräin agaangen. De Veräin gëtt elo 76 Joer al, an ass am Fong ëmmer op deem selwechten Site bliwwen. Ganz am Ufank am Klouschterpesch, duerno op der anerer Säit vun der Atert, am Notaire Faber sengem Park, a vun 1994 u mat der Aweiung vum haitege Fussballsterrain, nees zeréck am Klouschterpesch, do wou alles ugefaangen hat. No an no hunn eng Buvette, eng LED-Beliichtung, eng “Anzeigetafel” an ee Grillchalet d’Installatiounen ergänzt. Duerch déi aktuell gutt Resultater vun eiser éischter an zweeter Equipe an dem Fait, dass bal 100 Jugendspiller zu Useldeng lizenzéiert sinn, erlieft de Veräin momentan seng beschte Joren zanter sengem Bestoen.

 

Duerno huet de Georges Calteux, als ee vun de längste Memberen am Fussballsclub, den Erënnerungsbam virgestallt an huet iwwer d’Ufäng vum Veräin erzielt, deen zimmlech direkt nom 2. Weltkrich gegrënnt gouf. An den Ufanksjore war et nit sou einfach, ee richtege Ball opzedreiwen, sou dass och mol beim Metzler no enger Schwéngsblooss gefrot gouf, déi da fir dësen Zweck benotzt gouf. Hien huet och d’Gemeng Useldeng gelueft, déi de Site vum Fussballsterrain an de leschte Méint, ënner anerem och duerch d’Installatioun vun enger neier Spillplaz dach zimmlech opgewäert huet. Nom Georges Calteux senger Ried ass den Erënnerungsbam devoiléiert ginn. Et lount sech bestëmmt, mol op den Useldenger Terrain ze trëppelen, fir sech eisen Erënnerungsbam unzekucken.

 

Duerno war et um Buergermeeschter Pollo Bodem, deen op dëser Feier gläich zwou wichteg Missiounen hat. Nieft der Buvette ass am Laf vum Joer 2020 eng Annexe ugebaut ginn, déi als Grillchalet déngt an och nach ee weideren Trakt mat sanitären Anlagen abegräift. Et gouf also vun der Geleeënheet profitéiert, fir dës Anlag hirer Bestëmmung ze iwwerginn.

 

Et ass och schonn eng Zäitchen hier, wou am Kommitee vum Fussball d’Iddi opkommen ass, fir den neie Fussballsterrain zu Useldeng nom laangjärege President a Buergermeeschter Nic. Anzia ze benennen. Dës Propose huet den Zousproch vun der Gemeng kritt, a si hunn ee Panno mat der Opschrëft „Terrain Nic. Anzia“maache gelooss. Als Ofschloss vun deem schéine Mëtteg huet de Buergermeeschter dunn och dëse Panno devoiléiere gelooss an den Useldenger Fussballsterrain am Klouschterpesch op Terrain Nic. Anzia ëmbenannt.

 

No dëser Daf huet eise fréieren „aktiven“ Spiller aus der Härenekipp, den haitege Minister, Marc Hansen d’Wuert ergraff. Hien huet d’Leit begréisst an dem Fussball felicitéiert. Hie sot, dat e sech nach gäre géif u seng Zäit als Spiller erënneren, a virun allem d’Zäit an de Vestiäre géif hien nie vergiessen.

 

D’Lou Anzia-Ney, als Vertrieder vun der Famill Anzia, huet ofschléissend dem Fussball an der Gemeng, Merci gesot. D’Lou huet gemengt, dat den Nic., sollt hien dat dann do uewe esou matkréien, stolz an houfereg wier, dass den Useldenger Fussballterrain elo säin Numm dréit. Ee gudden Drot zum Petrus schéngt „eisen“ Neckel op jiddefalls ze hunn, well d’Wieder war trotz schlechten Ukënnegungen excellent, a sou konnt uschléissend den Éierewäin zerwéiert an de Mëtteg ausklénge gelooss ginn.

 

Bankkonto vum FC JEUNESSE USELDANGE: CCPL LU98 1111 7226 3885 0000

 

 

 

 

Claude Boudler